Gözəlləşmək istəyərkən, gözəlliyinizdən olmayın - Zərər verə bilən təbii maskalar

Ancaq təbii məhsulların da zərərli ola biləcəyini unudurlar. Şüursuzca tətbiq olunan "təbii maskalar" da dərinizə böyük zərər verə bilər.

Əlinizin altında olan və daim istifadə edə biləcəyiniz məhsullar bəzən cildinizdə müəyyən problemlər yarada bilər. 

TurpKimi.com ehtiyatla istifadə edəcəyiniz məhsulların siyahısını təqdim edir:

Limon

Zəngin antioksidant  tərkibi olan limon  dəridə  piqmentasiya problemlərini aradan qaldırmaq və dərinin parlaq olması   üçün birbaşa üzə tətbiq edilir. Limon çox  turşdur və dərinin pH tarazlığını poza bilir, ciddi allergik reaksiyalara, həddindən artıq quruluğa, qızartıya və dəridə soyulmaya səbəb ola bilər. Həssas və ya problemli bir dəri tipiniz varsa simptomlar daha da ağırlaşa bilər. Ona görə də birbaşa limon maskalarından uzaq durun və  ən yaxşı nəticə almaq üçün üz maskalarında yalnız bir neçə damla limon suyu istifadə edin.

Ağ şəkər tozu

Sərt olması həssas üz toxumalarına zərər verə biləcəyindən dərinizə  birbaşa şəkər tozu sürtməyin. Normal ağ şəkər tozu ilə pilinq etmək  dəri səthindəki mikro cırıqlar, iltihablanma, qızartı,  quruluq və digər  problemlərə yol aça bilər. Sızanaq problemi olanlar əsla ağ duz və ya şəkərdən istifadə etməməlidir, çünki bunların tətbiq olunması yara izi, qızartı və daha çox iltihablanmağa səbəb ola bilər.

Qabartma tozu

Üzü qabartma tozu ilə yumaq, üz maskası və ya pilinq kimi tətbiq etmək dərinin qoruyucu yağ baryerini ortadan qaldıra bilər və onu infeksiyalara, sızanaqlara qarşı müdafiəsiz qoya   bilər. Sağlam bakteriya florasını və həssas ferment tarazlığını pozmaqla yanaşı  qabartma tozu tətbiqi daha çox günəş həssaslığına və hiperpiqmentasiyaya səbəb ola bilər. 

Darçın

Darçın möcüzə dadı və ətri olan  mükəmməl ədviyyatdır.  İsidici təsiri olan darçın  birbaşa dəri üzərində istifadə edilməməlidir. Darçın qıcıqlandırıcı olduğundan hər hansı bir kosmetik vasitələrdə çox nadir hallarda  tapılar.  Dəriyə qulluq vasitəsi kimi istifadə etmək istəyənlər hamar və ləkəsiz bir dəri üçün ədviyyatı bal, zeytun yağı və s. ilə qarışdırıb tətbiq etməlidirlər.  

Bitki mənşəli yağ

Bitki mənşəli yağların istifadə edilməsi dəri səthini nəmləndirə,  eyni zamanda tıxanmış məsamələrə, sızanaqlara və parlaq bir görünüşə səbəb ola  bilər. Amma, rəfinə edilmiş yağlar  kimyəvi prosedurlara məruz qalır və bunları üz üçün  istifadə etmək yalnız dəriyə zərər verər. Quru dəriniz varsa, yalnız soyuq preslenmiş və orqanik bitki əsaslı yağlardan istifadə edin.

 Vüsalə Əlövsətqızı, TurpKimi.com