Hindistanda istehsal olunan öskürək siropu 20-ci uşağı öldürdü

Özbəkistanda 19 uşağın ölümünə səbəb olan “Hint Marion Biotech” firmasının “Dok-1 Max” öskürək şərbətinin daha bir uşağın ölümünə yol açdığı bildirilib.

TurpKimi.com xarici mediaya istinadla xəbər verir ki, Özbəkistan Səhiyyə Nazirliyindən verilən açıqlamada ölkənin Namanqan bölgəsində Hindistan istehsalı “Dok-1 Max” şərbətinin istifadəsindən sonra 3 yaşlı uşağın dünyasını dəyişdiyi qeyd edilib.

Məlumatda uşağın ötən ayın sonunda vəfat etdiyi deyilir.

Qeyd edilib ki, ötən ay Səmərqənddəki uşaq xəstəxanasında “Dok-1 Max” şərbəti içən 18 uşaq, Kaşkadərya bölgəsində isə 1 uşaq dünyasını dəyişib.

Məsələ ilə bağlı başladılan araşdırmalar zamanı öskürək siropunun laborator analizlərində preparatın tərkibində “etilen qlikol” adlı zəhərli maddə aşkarlanıb və preparatın ölkə ərazisində satışı qadağan edilib.

Firuzə Alimova / TurpKimi.com