Köklükdən əziyyət çəkənlər! - Mədəkiçiltmə əməliyyatına kimlər girə bilməz?


Günümüzdə insanların daha çox maraqlandığı mövzulardan biri də köklük problemidir.

koklukden-eziyyet-cekenler
09.12.2019 22:28 2 dəq oxuma

Piylənmə, çəkinin həddindən çox olması  insanları əməliyyata qədər aparıb çıxarır. 

TurpKimi.com son zamanlarda məşhurlaşan mədəkiçiltmə əməliyyatı haqda oxucuların bilməli olduqları vacib məlumatları təqdim edir:

Ümumi-bariatrik cərrah Kamran Rəfiyev mədəkiçiltmə əməliyyatı ilə bağlı bəzi məqamları  TurpKimi.com-la bölüşüb.   

Mədəkiçiltmə əməliyyatını kimlərdə aparmaq olar?

Mədəkiçiltmə əməliyyatı  təbii ki, hər pasiyent üzərində aparıla bilməz.  İlk növbədə xəstənin yaşı önəmlidir.  Ümumdünya Səhiyyə Təşkilatına görə  15-65 yaş arası insanlarda mədəkiçiltmə əməliyyatı aparıla bilər.

2-ci növbədə Bədən Kütlə İndeksi  (BKİ-Red.) əsas  rol oynayır. BKİ 35-in üzərində olmalıdır. Həm də pasiyentdə  yanaşı xəstəliklər -  yüksək təzyiq, qaraciyər çatışmazlığı, 2-ci tip şəkərli diyabet  varsa, qanda xolesterinin miqdarı artıqdırsa,   bu zaman  BKİ 35 yox, 32-nin üzərində olsa belə bu əməliyyat  icra edilə bilər.  Mədəkiçiltmə əməliyyatı zamanı mədənin 20-25 faizi saxlanılır, 75-80 faizi kəsib götürülür. Əməliyyatdan sonra  xəstə  istədiyi kiloya qədər düşə,  yəni normal bədən kütlə indeksinə qayıda bilirlər. 

Normal insanlarda  BKİ 19-25 arasıdır

Ekzogen xarakterli kökəlmə olduqda, yəni  pasiyentin kilo alması sırf xaricdən qəbul olunan qidalanma hesabınadırsa,  biz əməliyyat məsləhət görürük. Xəstə bizə müraciət edərkən ətraflı olaraq  sorğu-suala tutulur, əvvəlcədən diyetoloq yanında olubsa, fitneslə məşğul olubsa, kilo verə bilməyibsə və ya verdiyi kilolar bu prosedurları  saxlayan kimi  tez bir zamanda geri qayıdıbsa,  o zaman əməliyyatı icra edirik.  Yaş və  BKİ  çox önəmlidir. 

Mədəkiçiltmə əməliyyatına kimlər girə bilməz?

BKİ 35-dən az olan,  yanaşı xəstəlikləri olmayan şəxslərdə icra oluna bilməz. Bəzən bizə müraciət edən pasiyent bildirir ki,   boyu  165 sm-dir,  70 kilodur, 65  kilo olmaq istəyir.  Bu zaman təbii ki, əməliyyat  risklidir. Hər hansı bir psixoloji problemi olan xəstələrdə   də bu əməliyyat icra olunmur.  Hormonal,   böyrəküstü  vəzində  problemi olanlar  kök olurlar. Xəstə bizə müraciət edərkən  tam müayinə  paketi  yazılır. Əgər müraciət edən şəxsin kökəlmə səbəbi  tamamilə ekzogen xarakterlidirsə,  yəni xaricdən alınan qidaya bağlıdırsa, əməliyyat məsləhət görürük.  

Vüsalə Əlövsətqızı, TurpKimi.com